আঁক-বাক
~পদ্মনাভ কাকতি
যান্ত্ৰিকী অভিযান্ত্ৰিক বিভাগ
ৰাষ্ট্ৰীয় প্ৰযুক্তিবিদ্যা প্ৰতিষ্ঠান, শিলচৰ
১
মুঠিত লৈ ফুৰা জোনাকী পৰুৱাবোৰ
এপাক এৰি দিওঁচোন
মুঠিৰ উকমুকনি নোহোৱা হওঁক
পিঞ্জৰাৰ ভিতৰতে উৰিবলৈ শিকা পখীটিয়ে
উশাহ ল’বলৈকে এফেৰি অৱকাশ পাওঁক!
২
আজি আবেলিটো
ৰঙচুৱা হ’লে
জাকৰুৱা চৰাইবোৰক দেও দি
এই আকাশেদি উৰি যাবলৈ দিবি।
সিহঁতৰে পিছে-পিছে
কাগজৰ নাও লগা ঘাটবোৰ বিচাৰি যাম
আৰু পাৰিলে-
ডেউকা খুলি
সময়ৰ পাছত দৌৰিবলৈ লোৱা সময়ৰ
সেই মোহনাত ৰৈ যোৱা
নাওখনৰ জাল গুচাম।
৩
কেতিয়াবা সময় ওলিয়াই আহিবাচোন!
মনাকাশৰ কুঁৱলী ফালি
একেলগে বগাম
চেতনাৰ ওখ-ওখ
দ্বীপ্তোজ্জ্বল
পাহাৰবোৰ।
****